Von Reinhold Bruder*

«Schund!», het de Tüütschleerer krääit, mit der äinte Hand es John-Kling-Heftli gschwänkt und mit der anderen em Fränzu äis putzt. «Wi mängisch mues is no sääge? Dir sind Bezirksschüeler. Und Bezirksschüeler lääsen Aaspruchsvous. I der Schueubibliothek gits gueti Jugetbüecher, Saage und Sachbüecher. Settige Mischt wott i i mim Zimmer nie me gsee.» Er het s Heftli no äinisch i d Luft ghaa und denn verrisse. De Fränzu het e rooti Baggen überchoo und de zum Ürsu überegscheechet und gmützeret. Beed händ i de Mappe no mee Fueter ghaa; der äint Jim Strong, der ander Micky Maus. Am Schluss vo der Stund – aui händs gsee – isch de Leerer zum Roland ggange und het em e Band griechischi Saage änegstreckt.

Wider äinisch het de Grosvatter Roland zäme mit siner Fräu Rosa e Psuech bi de Grooschind gmacht, bim zääjeerige Georg und bim achtjeerige Gregor, der äint e groosse Lääser, der ander het no nie freiwiuig es Buech i d Hand gnoo. Im Gepäck händ d Groseutere zwöi Büecher ghaa. Daas Moou nüüt Wärtvous. D Rosa het sech nämlech duregsetzt. Für e Georg «Tom Gates» und für e Gregor «Böse Jungs», beedes Comic-Romään. De Georg het sech sofort derhinder gmacht, de Gregor het numen e chli pletteret. Am andere Morge sind si de Groseutere enggägegrönnt und händ luut grüeft: «Mir sind scho fertig.» De Gregor isch de gliich grooss Lääser woorde wi de Georg. Wo de Roland äinisch i de «Böse Jungs» gschnöigget het, het er zu der Rosa gmäint: «S isch zwaar scho chli Schund, aber miraa.»

*Deutschlehrer von 1966-2004. Aula-Mitglied seit 1997.